Beinggirl : إسألي نورا : إجابات نورا

إزاي اتخلص من شعر الوجه ؟
من سن 14 سنة وحتى خلال العشرينات هتلاقي شعر داكن بينمو في أماكن مش متوقعة زي وجهك ، شفتك العليا ، ذقنك ، وحتى في رقبتك.
لو شكل شعر وجهك مضايقك فيه طرق عشان تتخلصي منه :
بالنسبة لشعر الشفة العليا ممكن تجربي الحاجات دي :

- "بودرة تشقير " ودي موجودة في الصيديليات . لكن خلى بالك لانك لو سبتيها على بشرتك فترة أطول من اللازم ممكن يعرض جلدك لحروق.
- كريم مزيل الشعر: لكن جربيه الأول على جزء صغير من بشرتك لأنه ممكن يسبب حرق وعادة رائحته بتكون مش مستحبة .
- الإزالة بالشمع: ممكن تعمليه في البيت لكن يفضل ممكن تروحي احدى مراكز التجميل.

ساعات بتكون الحكاية مجرد شعيرات متفرقة ودي أفضل حل ليها هو الملقاط الصغير. لكن خلى بالك لأن ساعات بتكسري الشعرة من غيرة ما تشيليها من جذرها وبكده ممكن الشعر ينمو مرة تانية تحت الجلد.
حاجة واحدة ابعدي عنها وهي أمواس الحلاقة لأنها بتتسبب في نمو الشعر بشكل أخشن .
فيه طرق تانيه لازاله الشعر لكنها مكلفة مادياً زي استخدام الكهرباء والليزر، ولو قررتي استخدام حاجة منهم دوري على مختصص معروف ومصرح له باجراء العمليات دي واسألي كمان عن الاعراض الجانبية اللي ممكن تحصلك بعدها.

ازاي اتخلص من شعر جسمي ؟
بالرغم ان فيه ناس كتير شايفة ان مش ضروري ازالة شعر الجسم لكن فيه طرق كتير للتخلص منه زي التشميع أو حلوى السكر أو كريمات ازالة الشعر أو الحلاقة.
ساعات ممكن تلاقي شعيرات بتنمو في اماكن انتي مش متوقعاها زي ثدييك لكن متلقليش دي حاجة طبيعية مع تغير الهرمونات في جسمك لكن لو ضايقتك ممكن تشليها بالملقاط الصغير.

لازم أحلق شعر العانة؟
مش لازم لكن ده قرارك الشخصي ، وعامة ممكن تشيليه باستخدام الطرق اللي اتكلمنا عليها قبل كده زي كريم مزيل الشعر ،التشميع ، أو الحلاقة.
لكن خلي بالك كل وسيلة منهم ليها أعراض جانبية يعني مثلاً بالنسبة للكريم لازم الأول تختبريه على جزء صغير من جسمك تفادياً لأي أثار جانبية ممكن تحصل لجلدك.
أما التشميع ممكن انه يسبب إحمرار لجلدك لعدة أيام .و الحلاقة حتى ولو كانت بإستخدام جيد لموس حاد ممكن انها تسبب لك طفحاً جلدياً، عشان كده مهم انك تختاري الوسيلة المناسبة ليكي عشان تتجنبي الأعراض دي.

ليه بتظهر الحبوب على جسمي؟
متقلقيش.. دي من التغيرات الطبيعية اللي بتحصل لجسمك ، وبتحصل ل 90 % من الشباب في وقت معين في عمرهم.

وعشان تتغلبي عليها في أكتر من طريقة :

غسول الوجه الطبي :
لتنظيف جلدك استخدمي غسول طبي بدلاً من الصابون العادي . لأن الغسول بيزيل البكتريا المسببة للحبوب وكمان لا يسبب جفاف البشرة زي الصابون.

السوائل الطبية :
استخدام السوائل الطبية مفيد جداً لأنها تحتوي على مكونات مضادة للبكتريا، وكمان بتزيل الزيوت المتراكمة يومياً و بتفتح المسام .

قطن طبي :
فيه قطن طبي بيكون منقوع في محلول مضاد للبكتريا. وهتفيدك لأنها بتنظف المسام بشكل جيد وكمان بتسيب مكونات مضادة للحبوب على بشرتك وبكده هتمنع ظهور حبوب جديدة.
وعلى فكرة الحبوب مش بتظهر على الوجه بس لأ كمان ممكن على الظهر والصدر ومناطق تانية في الجسم.
لكن أهم حاجة حاولي انك تتجنبي عصر أو محاولة التخلص من الحبوب بإيدك .لأن ده هيخلي الحبوب تظهر أكثر وكمان هيسيب علامات مكانها لو اختفت.أو يسبب ظهور حبوب جديدة بعدها فترة قليلة.

تفتحات الجسم ...ايه سببها ؟
كتير من البنات بتعاني من نفس المشكلة في مرحلة البلوغ وده بيكون في منطقة الثدي والفخدين وحتي في المؤخرة.
وغالباً سبب التفتحات دي ان جسمك بينمو بسرعة كبيرة تخلي جلدك يتمدد .وللأسف مفيش وسيلة لازالتها غير انك تستني وهي هتختفي مع الوقت.

عايزة أعرف الوزن المناسب لطولي؟
مفيش مقياس أقدر أقولهولك دلوقتي. لأن تحت سن السادسة عشر جسمك بيكون لسه في مرحلة النمو وأي ريجيم في المرحلة العمرية دي خطر على صحتك.

حاسة ان وزني زيادة..ممكن أعمل ريجيم ؟
بدري قوي انك تفكري في الحكاية دي لأن جسمك لسه في مرحلة النمو.
ممكن تلاحظي ان فيه دهون زيادة في جسمك لكن ده مش معناه زيادة في وزنك لأن خلال مرحلة البلوغ الدهون دي بتتكون عند البطن والجانبين والفخدين وده لحماية أعضاء التناسل.وده علامة على صحتك ونموك بصورة طبيعية.
بشكل عام اهتمي ان أكلك يكون صحي ومتوازن ويفضل انه يحتوي على خمس جرعات من الفاكهة والخضروات الطازجة يومياً .
واهتمي بممارسة الرياضة وعدم الأكل بين الوجبات ده هيخليكي محتفظة بجسم متناسق.

ممكن تمارسي رياضة المشي وانتي في طريقك لمدرستك ..ده لو مش بعيدة قوي .
اطلعي على السلم العادي بدلاً من السلم الكهربائي.
خدي أخوكي أو أختك الأصغر إلي الحديقة أوالملعب وألعبي معهم بعض ألعاب الكرة.
لو كنتي على البحر انطلقي ..اجري على الرمال ده مفيد قوي لقدميك .
وانتي بتتكلمي في التليفون ممكن تمارسي رياضة بسيطة لمعدتك " قبض وبسط عضلات بطنك" .
الرقص طريقة رائعة لحرق السعرات والإستمتاع !