أزاي أعمل صداقات ؟
لما تقابلي ناس جديدة خليكي على طبيعتك عشان مياخدوش انطباع غلط عنك . ممكن تتعرفي على الناس من خلال الكلام عن اسلوب حياتهم و هواياتهم ولو مهتمين بنفس هوايتك ممكن تقترحي انكم تمارسوها مع بعض.
عامة في طرق كتير عشان تعملي صداقات جديدة مثلاً انك تشتركي في النادي أو تشاركي في أنشطة مختلفة كفريق مسرح أو فريق رياضي، ده هيزود فرصتك في التعرف على ناس جديدة كل يوم.
صديقاتي بيعاملوني بشكل سيء ومش عارفة أتصرف إزاي؟
لو حسيتي ان فيه أي حاجة مضيقاكي بسبب صديقاتك قولي لهم مشاعرك بكل صراحة..ولوكانوا أصدقاء بجد هيحاولوا يغيروا طريقتهم اللي بتضايقك،ولو ده محصلش يبقى انتي محتاجة تكوني صداقات جديدة وتختاري من يستحق صداقتك.
ساعات بلاقي ناس بتشتم وتقولي كلام مش لطيف، أعمل إيه؟
نصيحتي ليكي هي انك تتجاهلي كلامهم وده لأن هدفهم بيكون لفت الانتباه وانتظار رد منك.
أما لو بينك وبين شخص منهم علاقة مباشرة "يعني لو زميلك في المدرسة مثلاً " ممكن توضحي له انه لو استمر بهذا السلوك هتقولي لوالديك ولمدرسيك، ومتخليش الحكاية تضايقك لأن المشكلة فيه مش فيكي انت.
أتعرض للمعاكسة، أعمل إيه؟
مهم انك تقولي لوالديك ومدرسيك أو أي شخص قريب منك وعارفة انه يقدر يساعدك.
وتجنبي الخجل لأنهم عارفين ان انت مش سبب المشكلة وهيكونوا مستعدين انهم يساعدوكي بكل الطرق.
مش عارفة ليه بحس بغيرة من صديقتي ؟
لو حسيتي بالغيرة اسألي نفسك " ليه بتضايق لو صديقتي نجحت ؟ وليه أنا غضبانة كده ؟
واسألي نفسك "انا بتمني اكون مكانها؟!"
طبعاً طبيعي انك تتمني يكون عندك حاجات موجودة عند صديقتك ، لكن فكري شوية في نفسك هتلاقي عندك حاجات كتير قوي حلوة ركزي عليها وخليكي سعيدة بها .
التغيرات الهرمونية اللي بتحصل لجسمك بتأثر عليكي من الخارج " وهو شكل جسمك " ومن الداخل " الطريقة اللي بتحسي بيها" .
وخليكي فاكرة ان التغيرات دي مش بتحصلك لوحدك ولكن لكل البنات اللي في سنك.
نصيحتي لكِ انك تتوقفي عن مقارنة نفسك بالاخرين وافتكري دايماً انك مميزة وعندك صفات مش موجودة عند باقي صديقاتك.
صديقتي بتقلدني في كل حاجة وبطريقة بتضايقني ..أتعامل معاها ازاي؟
في البداية متخليش الحكاية تضايقك قوي لأن الناس بتقلد الحاجات اللي بتعجبها بس ، يعني تقليدها ليكي معناه انها معجبة بطريقة لبسك واناقتك .
هي غالباً مش واخدة بالها انها بتقلدك وكمان متعرفش انك متضايقة بالشكل ده.
ممكن تقوليلها لكن بشكل لطيف عشان متفقدش الثقة في نفسها وانصحيها ازاي تهتم بنفسها وتكون مميزة من غير ما تقلد أي شخص.
